#CIOBALITA || ₱12.2M KITA NG CITY NIGHT MARKET, NAGBUNGA NG OPORTUNIDAD SA MGA MALILIIT NA NEGOSYO SA LUNGSOD
Umani ng kabuuang ₱12,284,775.00 ang City Night Market ng Puerto Princesa mula Abril 10 hanggang 30, kung saan direktang nakinabang ang 48 maliliit na negosyante sa lungsod.
Malaki ang naitulong ng naturang kita sa pagtugon sa pang-araw-araw na pangangailangan ng mga vendor, kasabay ng pagbibigay ng mas matatag na kabuhayan at oportunidad sa mga micro at small entrepreneurs. Patunay ito sa patuloy na paglago ng night economy ng lungsod, na nagsisilbing mahalagang mekanismo upang mapalakas ang lokal na kalakalan at mapalawak ang hanapbuhay ng mga mamamayan.
Hindi lamang kabuhayan ang naitaguyod sa programa, kundi maging ang pagpapakita ng talento ng mga lokal na performers. Naging tampok sa gabi-gabing aktibidad ang iba’t ibang de-kalidad na pagtatanghal mula sa mga lokal na grupo at artists, na nagbigay-aliw sa publiko at nagsilbing plataporma upang maipamalas ang galing at kultura ng Puerto Princesa.
Naging posible ang tagumpay ng City Night Market sa tulong ng iba’t ibang stakeholders at private groups na naghatid ng makukulay na performances at aktibidad, na lalong nagpasigla sa daloy ng mga bisita at mamimili.
Ipinahayag ng administrasyon ni Mayor Lucilo Rodriguez Bayron ang kumpiyansa na magsisilbing mahalagang hakbang ang inisyatibong ito sa patuloy na pagpapalakas ng night economy at turismo sa lungsod, kasabay ng pagbibigay ng mas maraming oportunidad para sa mga lokal na negosyante at manggagawa.
Nagpaabot naman ng pasasalamat ang Pamahalaang Panlungsod sa lahat ng katuwang na ahensya at stakeholders, lalo na sa HER Events Organizing Services sa kanilang sipag at dedikasyon sa maayos na pag-organisa ng programa.
Sa kabuuan, ang City Night Market ay hindi lamang naging sentro ng pagkain at aliwan, kundi isang konkretong hakbang sa pagsusulong ng inklusibong pag-unlad—kung saan sabay-sabay na umaangat ang kabuhayan, kultura, at komunidad ng Puerto Princesa.
#PuertoPrincesaCity #NightEconomy
