#𝐀𝐠𝐫𝐢𝐓𝐚𝐲𝐨𝐃𝐢𝐭𝐨 || 𝐊𝐀𝐃𝐈𝐖𝐀 𝐍𝐆 𝐏𝐀𝐍𝐆𝐔𝐋𝐎, 𝐌𝐔𝐋𝐈𝐍𝐆 𝐈𝐒𝐈𝐍𝐀𝐆𝐀𝐖𝐀 𝐒𝐀 𝐏𝐔𝐄𝐑𝐓𝐎 𝐏𝐑𝐈𝐍𝐂𝐄𝐒𝐀; 𝐒𝐔𝐏𝐎𝐑𝐓𝐀 𝐒𝐀 𝐌𝐀𝐆𝐒𝐀𝐒𝐀𝐊𝐀 𝐀𝐓 𝐌𝐀𝐍𝐆𝐈𝐍𝐆𝐈𝐒𝐃𝐀, 𝐏𝐈𝐍𝐀𝐋𝐀𝐊𝐀𝐒
𝐄𝐧𝐫𝐢𝐪𝐮𝐞 𝐎𝐛𝐥𝐢𝐠𝐚𝐫, 𝐂𝐈𝐎 𝐁𝐚𝐥𝐢𝐭𝐚
Muling inilunsad ang Kadiwa ng Pangulo 2026 sa Atrium ng New Green City Hall ng Puerto Princesa mula Abril 30, na layong ilapit sa mamamayan ang sariwa at abot-kayang produktong agrikultural mula sa mga lokal na magsasaka at mangingisda.
Nagpaabot ng taos-pusong pasasalamat si Rhea Paitan ng Department of Labor and Employment (DOLE) Palawan sa City Agriculture Office at sa lahat ng katuwang sa programa. Binigyang-diin niya ang mahalagang papel ng mga magsasaka at mangingisda sa suplay ng pagkain at kabuhayan, kasabay ng pagkilala sa kanilang kontribusyon sa ekonomiya.
Ayon kay Paitan, malaking tulong ang Kadiwa ng Pangulo sa pagpapanatili ng kabuhayan ng maliliit na negosyante at sa pagtitiyak na may direktang pamilihan ang mga lokal na produkto—alinsunod sa layunin ng administrasyon ni Ferdinand Marcos Jr. na suportahan ang sektor ng agrikultura at maliliit na negosyo.Binanggit din niya ang naging matagumpay na implementasyon ng programa noong 2025, na nagpatunay sa epektibong pagtutulungan ng mga ahensya ng pamahalaan, asosasyon, at mga lokal na prodyuser.
Samantala, ipinaliwanag ni Mary Glo Simon ng City Public Employment Service Office (PESO) na nagsisilbing tulay ang programa upang direktang maihatid sa mamamayan ang de-kalidad at abot-kayang produkto mula sa mga magsasaka at negosyante.
Nagpasalamat naman si Melissa Theodora Macasaet sa patuloy na suporta ng mga magsasaka, mangingisda, at mga asosasyon, kabilang ang 44 na farmers associations mula sa lungsod at lalawigan, na aktibong nakikibahagi sa programa.
Kabilang sa mga lumahok na exhibitors ang iba’t ibang lokal na grupo at negosyo tulad ng mga samahan ng magsasaka, food processors, at kooperatiba na nag-alok ng sariwang gulay, prutas, produktong agrikultural, at processed goods.
Isinagawa ang aktibidad kasabay ng pagdiriwang ng Araw ng Paggawa, bilang pagkilala sa mahalagang ambag ng sektor ng agrikultura at paggawa sa pagpapaunlad ng ekonomiya.#CityAgricultureOffice #PuertoPrincesaCity
