“Ang ganda ng health care system niyo, super.” Ito ang naging papuri ni Department of Health (DOH) Undersecretary Glenn Mathew G. Baggao sa pagbisita at pag-iikot nito sa bagong gawang City Health Medical Complex ng lungsod ng Puerto Princesa.
Kasama ni DOH Usec. Baggao sa isinagawang ocular inspection ngayong araw, Enero 14, 2026, si Assistant Regional Director Raffy A. Deray ng DOH – Center for Health Development (DOH-CHD), DOH Ospital ng Palawan Chief Administrative Officer Angelo Karagdag at iba pang mga kinatawan mula sa DOH-CHD at DOH Central.
Inilibot ni City Health Officer Dr. Ricardo Panganiban at Assistant City Health Officer Dr. Dean Palanca ang mga nabanggit na bisita sa buong gusali, mula ground floor hanggang mezzanine floor.
Matatagpuan sa ground floor ang iba’t ibang Outpatient Department Services. Nasa ikalawang palapag naman makikita ang iba’t ibang tanggapang may kinalaman sa kalusugan habang nasa mezzanine floor ang extension office ng Provincial Department of Health o PDOHO.
Nakatakda namang isagawa sa Lunes, Enero 19, ang Commissioning of the City Health Medical Complex, na pangungunahan ni Mayor Lucilo R. Bayron,
bilang hudyat ng pormal na pagsisimula ng operasyon ng nasabing pasilidad.
