PASUWELDO SA MGA EMPLEYADONG CASUAL AT CONTRACTUAL MAY TAKDANG ARAW NA

Puerto Princesa, November 9 CIO - Inaprobahan na ng 14^th Sangguniang Panglunsod ang pagpapatupad ng Ordinansa Bilang 696. Ito ay nagtatakda na kinakailangan bayaran ang mga buwanang sweldo ng mga  empleyado ng Pamahalaang Panlungsod ng Puerto Princesa na mga kontrakwal at job order tuwing katapusan ng bawat buwan na hindi naman dapat lalampas sa a-kinse ng susunod na buwan.

Ang ordinansa ay iniakda ni Kgd. PETER Q. MARISTELA  upang maiwasan na ang hindi regular na pagbabayad ng buwanang sweldo ng mga nabanggit na mga empleyado. Ang ganitong kalakaran ay karaniwang nauuwi sa pangungutang na may mataas na interes. May pagkakataon pa na nahuhuli ng isa hanggang dalawang buwan ang pagbayad ng mga sahod. Nagreresulta ito  sa malaking pahirap sa pinansiyal na pangangailangan ng mga manggagawa.

            Ibinigay ang kapangyarihan at responsibilidad sa Tanggapan ng Panlungsod na Ingat-Yaman na siyang magrerepaso sa mga batas at regulasyon upang makapagbalangkas ng bagong talakdaan para maisakatuparan ang mabilis na proseso sa pagpapatakbo ng mga kinakailangan dokumentong sa pagpapasweldo.(amie)